 السلام عليكم ورحمة الله ... اهلين اختي ستايل ... خطوة بالمرة ممتازة لإقامة مشروع ماشاء الله عليك ... الله يبارك لك ويوفقك ... شوفي يا قلبي انا مع مقولة د. طارق السويدان
أفضل استثمار لطاقة الفرد هو انه يدرس و يعمل ويتطوع في مجاله هذا افضل استثمار لطاقة الفرد
بمعنى فكرة المشروع حلوة لكن ينقصها اركان و شويت حاجات بسيطة حتتغلبيها المطلوب منك الان انك تركزي على هدفك و تحددي خطواتك وعلشان تحددي خطواتك اعملي دراسة جدوى للمشروع وادرسي الفكرة ببالك مضبوط ... وبالنسبة للرأس المال لا تخليه عقبه ممكن تعملين مشروع صغير يدخل عليك راس مال يساعدك على القيام بالمشروع الكبير ... وهذة قصة واقعية حصلت مع وحدة اعرفها ... كان في بنت مقيمة "مصرية الجنسية" درست وتعلمت هنا في السعودية وطبعا بعد الثانوي تبغى تكمل جامعة وماقدرت هنا وما عندها قدرة على السفر والدراسة في مصر خصوصا ان اهلها حالهم ضعيف ...
البنت بدات تعطي دروس خصوصية في البيت لبنات 4 -5-6 ابتدائي في الشهر الاول دخلت 1600 على 4 بنات كل وحدة على 400 الشهر تعطيهم درس رياضيات من سنة خامس كل يوم وفي الشهر اللي بعده الاربع بنات زادوا ما شاء الله ... المهم البنت كملت الترم الاول وبناتها ماشاء الله اخذين الفل مارك في الرياضيات تحول العدد من 7 بنات الى 16 في الترم اللي بعده ... وعلى اخر الترم بالضبط الاسبوع الاخير للاختبارات جوها 5 من اول المنهج
وبس يا قلبي الله بارك لها وفضل من الله ودعاء الوالدين البنت قدرت تتعلم في جامعة الاسكندرية تخصص تجارة بعد 3 سنوات من المشروع ... ورجعت بعد الدراسة لا زواج والا وظيفة كملت مشروعها حق الدروس الخصوصية وبعد 5 سنين كمان البنت قدرت تعمل استثمار مضبوط اشترت مزرعة في مصر وعملت مشروع زراعي ومبسوطة هي واهلها وما شاء الله عليها الله يبارك لها
مثل ما قلت لك لو حطيتي هدف حتوصليله بتحديد الخطوات ... بالتوفيق على فكرة اول ما يقوم المشروع اعزمينا حتى نكون اول الطلاب ... بالتوفيق
|
ميرسي لافندر الله يخليك بمساعدتك ليّا بالمعلومات دي وبعد شويه حأدخل عالروابط إلي نزلتيها
بالنسبة لتكاليف المشروع بابا الله يديه الصحة هوه إلي حيشرف ع الموضوع ماديا لكن من ناحية نجاح أو فشل الموضوع ماني عارفه حاسه بالمسئولية مرا كبيرة يمكن لمن أبدأ أول خطوة واعمل التصاريح نكسر الحاجز شويه وكمان المشروع حيأخد وقت مرا طويل من ناحية توظيب المعهد والتصريح والتأمين ع المعهد والكلام دا
وحتكوني أول المدعوات لمن يتم إفتتاح المشروع من دحين "