[أمل جديد]

أنا مع كاتب الموضوع

برأيي,, الوضع هذا قاعد يزيد يوم عن يوم بشكل ملحوظ جدا, والسعوديين والسعوديات حتى لو متعلمين ومثقفين ومعدلاتهم حلوة ما يلاقوا وظيفة عدلة إلا بالمناحلة والانتظار الطويييييل بحجة انه (مافي احتياج) أو (التوظيف واقف عندنا) أو ياخذوا بياناتك ويقولوا نتصل عليك وطبعا لا حس ولا خبر بعد كذا

أنا معدلي أكتر من 4 ونص وعندي دورات وحاسب وكل شي, وقدمت على الجامعة وعلى مركز اللغة من يوم ما اتخرجت ولا اتصلوا, وطبعا انا متوقعة النتيجة مسبقا بس قلت أسوي اللي عليا,

كنا في مشكلة الواسطة ودحين زادت عليها مشكلة توظيف الأجانب (الزايد عن حده, اعيد واكرر الزايد عن حده يعني احنا مو ضد الاجانب بس كل شي زايد عن حده ينقلب ضده), اللي قاهرني انه الجامعة وظفت حتى هنود وهنديات, ومو اثنين ولا ثلاثة, لا كثير سواء رجال أونساء, وبنات وأولاد البلد المتخرجين بالمئات قاعدين يدوروا وظايف وماهم محصلين, ولا تقولوا السعوديين شايفين نفسهم لأن لو فيه نظام محدد ورقابة على الموظفين ما كان كل واحد سووا اللي يبغاه, بس الوضع للأسف (سلطة) واعذروني للكلمة


غير كذا قدمت على ديوان الخدمة المدنية وغيرها من الأماكن ولا في اي نتيجة..

اشتغلت في مدرسة اهلية, وعانيت الأمرين من راتب متدني ولا و يخصموا منه على الطالعة والنازلة, ومافي حوافز ولا تأمين ولا سلم وظيفي ولا شي, ودلع البنات في المدارس الأهلية اللي يعاملوا المعلمة باستهتار لأنهم عارفين انه لا حول لها ولا قوة والأهم عند المدرسة الطالبة أولا وأخيرا ودايما المعلمة هي الغلطانة.

صحيح البعض يقول لازم نثبت نفسنا ونجتهد بس محد معطينا وجه حتى نبدأ, وللاسف اغلب صاحباتي في هذا الوضع يا في مدارس أهلية يا قاعدين في البيت,
اذا هذه مشكلة مجموعة كبيييرة من المتخرجين لا عشرة ولا عشرين ولا حتى مية, اكثر بكثييييييييير ويا خوفي ان العدد يزيد, فمن الطبيعي انه نشعر بالظلم والقهر والاحباط وخيبة الأمل والخوف من المستقبل واحنا قاعدين نشوف تزايد عدد الأجانب اللي متوظفين في وظايف حلوة واحنا حالتنا ما يعلم فيها إلا الله

آآآآآآآسفة على الإطالة بس كل المكبوت في نفسي طلعته (خصوصا اني فاضية على الاخر لا شغلة ولا مشغلة), وأتمنى ان وضعنا يتحسن وتنحل مشاكلنا, إن الله على كل شئ قدير

تقبلوا تحياتي واحترامي