[soma al7elwa]

ماس عزيزتي واضح عندك نظرة رجال الدين هم الدين كله ..

أحمد الشقيري عمره ما جاب فتوى من عنده .. ولا قد مرة ألف كلام من عنده .. كل اللي يقول الشيخ فلان قال كدا والشيخ فلان قال كدا .. في وجهة نظر بتقول كدا ووجهة نظر بتقول كدا .. يعن مجرد ناقل مو أكتر

ومسكين اول امس لما جا على بانوراما متعقد .. طول ماهو يتكلم وهو يقول ياجماااعة انا مابفتي انتو روحوا دوروا بنفسكم .. والله طووول اللقاء وهو ياجماعة روحوا دوروا بنفسكم عشان لحد يقول احمد بيفتي انتو دوروا بنفسكم وشوفوا ..
حزنت عليه ..

يعني في حلقة القمرة مثلا .. انا مو شايفة انو في اي غلط فاللي قاله .. كلامه صح مليون فالمية ..

يعني بالفعل تلاقي واحد جالس بيفتيلك التصوير حرام .. وهو بسلامته جاي فالتلفزيون قدام الكاميرا .. واللي اساسا اخترع فكرة القمرة "الكاميرا" عملها فوسط الأزهر ..

واسلوب الكلام والتعليق بالزبط نفسس الكلام اللي قالوا امس في حلقة الحسبة والبلدية والتفتيش .. ونفس الكلام اللي قاله عن المستشفيات والقطاع الصحي .. ونفس الكلام اللي قاله عن المساجد وترتيبها ونضافتها ..

لكن عارفة ايش الفرق ؟

الفرق إنه فكل الحلقات التانية كان يتكلم عن عن ناس واشخاص ماعندنا نظرة "التقديس" لهم .. بس لما جا واتكلم عن رجل من الدين .. هنا لقيتي الناس تهيج .. ليش؟؟؟

عشان فنظرتنا مجتمعنا رجل الدين هو الدين ..

طب رجل الدين اللي بيغلط مو زيه زي الدكتور اللي ممكن يكون عالج مئات والاف الناس ولو غلط غلطة مع مريض او اتنين ولا صرف دوا غلط قامت الدنيا ولا قعدت وسمعته تتشوه وسمعة المستشفى والوزارة والقطاع كلو ؟

ليش هنا نرضاها وهنا مانرضاها؟

ليش التقديس دا وكأنهم معصومين عن الخطأ او ملائكة أو انبياء يوحى اليهم ؟

ليش شخصنة الدين دي؟

الدين ماهو اشخاص وشيوخ ..

ترى رجل الدين هو رجل بشري عادي يصيب ويخطئ ولما يخطئ لازم يعرف غلطه ..

عارفة ايش اجمل شي فالاسلام من وجهة نظري؟

أنه مافي أي مخلوق يسمح لنا بتقديسه وتعظيمه حتى النبي عليه الصلاة والسلام وهو المعصوم عن الخطأ ..

لا يوجد تقديس سوى لله عز وجل..

والشقيري رجل عادي يصيب ويخطئ ويظهر في برنامجه وجهة نظره هو .. خواطره هو ..

وإن كان يخالف قول أحد رجال "الدين " في قول ما فهو بيستشهد بآخرين وبيجيب حجج عقليه ودينيه .. مو شرط عشانه قال برأي يخالف رأي احد ما يعني هو صح والتاني غلط أو العكس

زي ما قال الفقير الى الله فاضاءات ..

"لوجيت وقلت ابن باز يرى أن غطاء الوجه واجب حتلاقي ناس تقول والله الرجال دا ممتاز وكلامه حلو ويفهم ولوجيت وقلت الشيخ القرضاوي مثلا يرى بجواز كشف الوجه حتلاقي نفس الناس دول تقول الرجال دا مايفهم ويتدخل فأمور ماتخصه وماله ومال الدين والخ "

"وجهة نظر شخصية"