[بحر الحرية]

المشاركة الأصلية كتبت بواسطة فديــــتني اخوي بحر الحريه الله يسعدك لي اخت انتساب وقالولها ما تحول انتظام الا لو معدلها 4.75 وهي غير سعوديه المهم جابت معدل 4.71 ولمن جات بتقدم ع التحويل ( تحويلهم زي قبولنا الاجانب ) يعني يرفعوها لوزارة التعليم العالي المهم ما رضيوا الرجال يعطوها ورقه يقولولها لازم 75 فكرت اقدم خطاب انا باسلوب لوزارة التعليم العالي وانت كاتب في الطريقة الثانية للقبول البريد الممتاز ونظام البرقيه .. كيف اقدم بدي الطريقه ابى اعرف اتعامل مع اي قسم بوازرة التعليم العالي.. يعني ما ارسل ع فاكس عام او بريد الكتروني عام اكيد انو حينهمل لو مو هيا الجهة المتخصصه

أهلا أختي فديتني..

الطريقة إنك تكتبي خطاب توصفي فيه حالتك وومعدلك وطلبك كامل باسم وزير التعليم العالي الدكتور
خالد العنقري، وتختاري بين إنك ترسليه بالبريد الممتاز أو بنظام البرقيات..

البريد الممتاز: تكتبي الخطاب وتحطيه ف ظرف وتاخديه لأقرب فرع للبريد السعودي وتكملي
الإجراءات وبعدين بعد اسبوع تتصلي على وزارة التعليم العالي في الرياض وتقولي لهم عندي معاملة
وأبغى أعرف رقم التحويل، حياخد منك رقم الإرسالية ويديكي رقم وترجعي تتابعي في الجامعة إيش
يصير على موضوعك عندهم.

نظام البرقيات: تكتبي الخطاب وتجهزيه عندك، وتجيبي رقم هوية صاحب التلفون اللي حترسلي منوو،
ورقم هوية أختك اللي حيكون باسمهاا الخطاب، وتتصلي على 969، حياخد منك البيانات كاملة من
هوية ولمين حترسلي واسم المرسله وتلفونكم والجوال ووو إلخ، بعدين حياخد منك الكلام اللي تبغي
ترسليه لهم يعني تقعدي تنقليه كلمة كلمة، وبعد ما تخلصي معاه راح يديكي رقم البرقية، ونفس الكلام
حتتابعي معاهم في الوزارة أول شي عشان تاخدي رقم تحويل المعاملة للجامعة، وبعدين تتابعي في
الجامعة وتشوفي إيش صار معاكي..

كل الطريقتين زي بعض في السرعة وضمان الوصول والقوة، لكن الأولى لازم تروحي توصليه بس
السعر موحد سواء أرسلتي كلمة ولا ورقة ولا عشرة، التانية أسهل ومن البيت لكن تنحسب عليكي
بعدد الكلمات وكل كلمة أعتقد بنص ريال، ف شوفي إيش اللي يناسبك وأسهل عليكي انتي.

بس راح أديكي تنبيه:
أنا ما أبغى أحطمك ولا أحبطك، بالعكس جربيها لأنك ما تعرفي إيش الخير اللي ربنا يكتوو،
لكن في الغالب لو الوزارة ما قبلتها، راح تكتب عليها لمن تحولها للجامعة: تُعامل بحسب النظام.
فلو النظام قال 4.5 راح يقبلوها، لو النظام قال 4 حيقبلوها لو النظام قال 4.8 راح يقولولك مافي قبول.

أنا ما أقلك لا تجربي، بالعكس سوي اللي تقدري عليه، بس عشان تكوني عارفة الوضع..

والله يكتبلكم اللي فيه الخير يارب، ويحقق لأختك التحويل إنشاا الله وتكون من المنتظماات معاناا ياارب؛؛