رد: إستفسارات : عن التحويل من نظام التعليم عن بعد إلى إنتظام بعد السنة التحضيرية.
انا حقولك تجربتي ... انا خريجة 2009 يعني خلصت سنتي التحضيريه و الحين في مرحلة القبول ..
اول حاجه احسن شي في التعليم عن بعد انو في اعمال سنه >> يعني يرفع المعدل .. اهم شي لازم تشدي حيلك من الترم الاول عشان تضمني التحويل ..
بالنسبه للمعدل حق التحويل من 3.75 و ما فوق .. الي يجيب اقل من كذا ينسى فكرة التحويل إذا ماعندو واسطه ..
او إذا ما كانت طلبات كثيره للتحويل و هذا شي نادر جدا !!
بس مو شرط كل الي جاب 3.75 يتخصص في التخصص الي يبغاه بعد التحويل ممكن يترمي في شي مايبغاه
و هذا يعتمد على المقاعد الفاضيه و المعدلات الي حتنقبل فيها ..
مثلا لو تبغي تدخلي إدارة و اقتصاد هما عندهم 150 مقعد فاضي حيقبلوا اعلى 150 نسبه من رغبات التحويل و ممكن يوقف التسكين عند 4.0 و ممكن اكثر و ممكن اقل على حسب المعدل الاجمالي للبنات المتقدمين على التسكين في الكلية ..
و بالنسبه للتحويل تقدري تحولي .. بس لازم يسوا حركه حرق اعصاب كل سنه و يقولوا مافي تحويل بس هوا في
بس يسوا كذا عشان يخلوا الطلاب يفقدوا امالهم نحنا صارت لنا و كمان صارت للدفع الي قبلنا بس الحمدلله التحويل حيكون في نص رمضان ..
الله يكون في عونكم و يوفقك .. وفي حاجه مهمه جداااااا
لو انتي طالبة علمي في الثانوي و دخلتي تعليم عن بعد حتدرسي طبعا إداري انساني ..
و الحين نزل قرار جديد انو إدارة الاعمال صارت فقط للمسار العلمي للسنه التحضيريه .. و فقط كم قسم من كلية الاقتصاد و الاداره لإداري والانساني ..
اما لو تبغي شي ثاني من المسارات الادبيه الوضع عادي ..
بس لازم تشدي حيلك ترى بالراحه تجيبي معدل بس لازم تضمني اعمال السنه في جيبك
وتذاكري كويس للنهائي و تشدي حيلك في الترمين
انا جبت في الترم الاول 4.31 و الترم الثاني 4.21 و طلع التراكمي حقي 4.26 الحمدلله و يارب احول على خير ((( ادعيلي )))
وزي ما المعدل تقدري تجيبيه بسرعه ترى ينخسف بسرعه لو تكاسلتي ..
في وحده من صحباتي معدلها الترم الاول كان 4.65 مررررره كويس بس تكاسلت الترم الثاني و جابت 3.70 شي زي كذا مني متذكره الرقم بالضبط ..!!
تخيلي طلع معدلها التراكمي 3.88 مره انخسفت عن الترم الاول ..
شدي حيلك انتي و سوي الي عليك وان شاء الله تنتظمي ^__^
اما بالنسبه للشروط الاخرى ليست ذات اهميه سوا انو تكوني سعوديه او من ام سعوديه عشان تحولي
وإذا ما كنتي كذا تقدري تقدمي طلب منحه من السفاره بعد السنه التحضيريه للتحويل و ربنا يوفقك ^____^ ..
وان شاء الله اكون افدتك .. لا تنسيني من دعوه طيبه عند افطارك ^.^
|