اختي rubi
في البداية اقولك سهل الله دربك ويسر الله امرك ,, وشكرا لكل من حاول مساعدتك وماشاء الله الاخوان والاخوات اللى يحبو الخير كتير وانا استفدت منهم كتير فجزاهم الله كل خير,,
اما عن موضوعك , انا راح اقولك الطريقة اللى استخدمها في اتخاذ قراراتي وخصوصا المصيرية اللى زي كدا ,, وان شاء الله تظبط معانا في الاخير ونقدر نطلع بقرار واضح و صحيح ,,
اول حاجة احنا عندنا المعطيات واللي هيه
طالبة جامعية ,,, معدل 3 من 5 (انا ما اعرف معدلك لاكن من قرائتي السابقة يمكن يكون حولينه) ,,, انهيتي 4 مستويات ,, تبغى تحولي انتظام ,, تبغى معدل افضل ,, محتاجة وظيفة
ثاني شي عندنا الهدف والحمد لله انو واضح :
الدراسة في تخصص ترغبيه و التحويل للدراسة بنظام الانتظام في جامعة الملك عبدالعزيز ورفع المعدل العام للحصول على وظيفة او اكمال دراسات عليا,,
طيب نقول بسم الله الرحمن الرحيم ونبدأ بالخيارات وطبعا في هذى الحالة عندنا خيارين فقط:
الخيار الاول : الاستمرار في الدراسة على هذا الحال وبالمعطيات الموجودة الحالية
الخيار الثاني : الانسحاب من الجامعة والبداية من جديد وفي سنه جديدة
وراح ندرس كل خيار على حدة ونشوف الايجابيات والسلبيات لاتخاذ هذا القرار , (وكل ايجابية تكون بدرجة وكل سلبية ناقص درجة)
ودحين ندرس الخيار الاول واللى هو:
الاستمرار في الدراسة على هذا الحال وبالمعطيات الموجودة الحالية , وراح نبدأ بالايجابيات:
1- الحمد لله انهيتيى4 مستويات في الجامعة وهذي اخذت من عمرك سنتين كاااملة ويعتبر هذا انجاز عظيم (درجة واحدة)
2- الحمد لله انتي الان تدرسي في التخصص اللى انتي تبغية والتخصص اصلا والحمد لله ممتاز جدا وله مستقبل (درجة)
3- المعدل ليس سيئا على الاطلاق ويعتبر جيد الا حد ما ,, يعني معدلك طيب (درجة)
4- قدامك 4 مستويات قادمة وتقدري بسهولة ترفعي معدلك (انا شخصيا بدأ معدلي بالزيادة بعد المستوى الرابع (درجة)
5 - التخرج راح يكون مبكرا وماشي مع عمرك والحمد لله وهادي حاجة طيبة جدا وتستاهل (درجة)
6- تخرجك المبكر ان شاء الله راح يفتحلك مجال وفرصة ووقت اكبر في البحث عن وظيفة او اكمال دراسات عليا , يعني لو تخرجتي متأخره سنتين راح يكون فيه تكدس طالبات اكبر وراح تضعف فرصك في الوظائف , يعني راح تسبقي ما لا يقل عن 10 الاف بنت كانو راح يزاحموكي على امور كتيرة بس انتي سبقتيهم ,, (درجة)
7 - الرسوم المالية اللى متبقية عليكي قليلة واقل من لو رجعتي من اول وراح توفري بهدا القرار 12 الف ريال
8- نجحتي والحمد لله في مواد كانت صعبه وقدرتي تتجاوزيها وما تدري راح تعديها بعدين او لا (درجة)
ونجي دحين للسلبيات الخاصة بالخيار الاول :
1- الدراسة بنظام الانتساب (ناقص درجة)
ونلاقي انو الخيار الاول يعطيكي 7 درجات بعد ما نقصنا مجموع السلبيات من الايجابيات
ونشوف الخيار التاني ونبدأ بالايجابيات:
الانسحاب من الجامعة والبداية من جديد وفي سنه جديدة
1- فرصة اكبر للدراسة بنظام الانتظام (درجة )
2- راح تكون المواد عندك اسهل لاول سنه لانك درستيها وفرصة رفع المعدل في البداية ممتازة (درجة)
ونشوف دحين السلبيات لقرارنا هذا :
1- الطريقة هذه غير مضمونه ابدا نظرا للتغير السريع في انظمة الجامعة (ناقص درجة)
2- راح منك سنتين كاملة من عمرك وتاخرتي عن التخرج فيها (ناقص درجة)
3- التخصص اللى تبغية مو مضمون ابدا ويمكن ما راح تقدري تدرسي فيه بعد كدا وتلاقي نفسك في الاخير تدرسي تاريخ ولا جغرافيا (ناقص درجة)
4- هامش المخاطرة جدا عالي واحتمالية حدوث امور اخرى غير متوقعه كبير جدا جدا (ناقص درجة)
5- صار فيه مواد جديدة زي الفيزيا والكيميا للطلاب الجدد في السنه الجديدة ,, وما تدري ايش كمان مستخبي (ناقص درجة)
6 - ما راح تضمني ابدا الحصول على معدل عالي لان الظروف تتغير ودائما اللى نتخيله ما يطلع صحيح (ناقص درجة)
ونشوف دحين كم مجموع هذا القرار لو اتخذناه :
-4 بعد ما نقصنا السلبيات من الايجابيات
اذا الخيار الاول واللى هو الاستمرا ومحاولة رفع المعدل اعطانا 7 درجات اما الخيار التاني كانت درجتة (- 4)
مع العلم ان التوظيف ماله علاقة ابدا بالانتساب او الانتظام والشركات ما تنظر لهذا لشي وغير كدا المعدل اذا كان بتقدير جيد واعلى فلن تواجهي مشاكل ان شاء الله في عملية التوظيف وهذا بحكم اني اشتغل في مجال الموارد البشرية والتوظيف من 5 سنوات , يعني لا تفكري فيه ابدا (ماله علاقة بالتوظيف في كثير من الشركات)
صراحة انا اشوف تختاري خيار الاستمرار وانتي مغمضة ,, ومافي نقاش اصلا ,,
على العموم انا افضل انك تستمري وتشدي حيلك وانا زي ما قلتلك والحمد لله رفعت معدلي بعد المستوى الرابع , والمجهود اللى كنتي راح تبذلية في سنه جديدة , حاولي تستغليه الترم الجاي ,, ولا تنسي انو الخيار الثاني فيه مخاطرة كبيرة جدا ,, وممكن حتى ما تنفع معاكي هادي السنة ويصير راح عليكي 3 سنوات بدل سنتين ,, وربنا يوفقك ,, وييسر طريقك للخير ,, ,,