[DANoOo.R]

اممممم السنه التحضيريه أو بالنسبه ليا التحطيميه
ما أنكر أنها سنه حلوة وسيئه في نفس الوقت
استمتعت فيها وضحكت وبكيت وزعلت وكل شي وكان كل يوم بالنسبه لي تحصل فيه أحداث جديه
كنظام الحمدلله ماواجهت صعوبه لأني كنت في مدرسه مطورة نفس نظام الجامعات ولازم تعتمد على نفسك
والمواد أخ نجي للمواد

الأحياء>>ماده ممتعه بس محاضراتها تجيب النوم وبالذات أنها كانت في الصباح ياسلاااام أحلى نومه في الكلاس
بس متعبه في المذاكره وكل اختبار أحياء لازم أبكي قبل الاختبار لأني ماخلصت الأسئله المقلوبه خخخخ

الكيمياء >>ياكرهي لدي الماده ودكتورتها جدا إنسانه سيئه لأبعد درجه حسبي الله عليها ونعم الوكيل كانت تقولنا خذوها صيفي ايش يعني لو حملتوها معاكم إن شاء الله تحملوها وحملناها معانا كأنو باب السما كان مفتوح وقتها وربنا استجاب دعوتها حسبي الله عليها 37 طالبه تقريبا من الشعب اللي تدرسها راسبين في الكيمياء>>مقهورة منها

الإحصاء>>ماده ممتعه ومحاضرتها كنت احرص أني ما أضيعها مو أول مره تعدي عليه أخذتها في الثانوي وفي الجامعه أسهل من الثانوي بكثييييير ودكتورتها ربنا يسعدها جدا رااااائعه وشرحها خطيييير ماشاء الله

الفيزياء>>مدري ايش تبغى دي الماده من الحياه يعني تفاحه طاحت على الأرض لازم يسوي حكايه
بس على العموم كانت محاضرتها ممتعه لأنه الدكتورة ماتدري عن نفسها والبنات شغالين كلام وطبعا كنت انا وصحباتي نتكلم ووحده مسكينه دايما تنظلم وتغير الدكتورة مكانها حتى في الاختبار ماسلمت منها هههههههه

الرياضيات>>ماده سهله ومحاضرتها كنا انا وصحباتي نقرر أنه مانركز مع الاستاذه ونقعد نتلكم وكل الكلاس مشغول بالبلاك بيري خخخخ

الحاسب>>ماده غير متطوره وممله بس ترفع المعدل

مهارات الاتصال>>ماده ممتعه وحلوة ومن واقع حياتنا واستفدت منها كثير

الانجليزي>>حبيب قلبي في الترم الأول مرررره كان جنااان وفله كانت دكتورتنا هنديه وماتفهم عربي وفي الاختبار أنواع الغش بالعربي هههههههه بس اتعلمت كم كلمه خخخخ
والترم الثاني جدا ممل وكلاس بارد مافيه حماس كنت تقريبا ساحبه على كل المحاضرات

باختصار >>دا كله ولسه في اختصار
استفدت من دي السنه اتعرفت على بنات كثير كونت صداقات في فرع الفيصليه وفرع السيلمانيه وأغلبهم من المنتدى
بنات زي العسل ياناسوا عليهم
طبعا ماننسى أخواننا الأولاد كمان اللي في المنتدى جدا رائعين ساعدونا في أشياء كثيره
الأخ مراد..ود/روميو..راقي ورايق..Life as Game..MUDY-MA..الزعيم..د.أسامه وكثير من الأولاد يعطيهم العافيه ويوفقهم يارب

وأتمنى من الكل يسامحني إذا في يوم غلط أو أحد اضايق مني
وسوري على الاطاله والتعبير اللي كتبته خخخخ

بالتوفيق للجميع وإن شاء الله الكل يدخل التخصص اللي يبغاه ^_^

DANoOo.R