[raddow]

بسم الله الرحمن الرحيم
.
.
.
.
.
.
.
.
.
.
كيف حال الشعب الطموح ؟؟
طيبين ؟؟
على طول إن شا الله
ندخل في الموضوع
أنا أحد طلاب خطة " ب "
فرحت أول ما شفت جدولي بداية السنة
قلت حقين خطة " ب " جدا مرتاحين
و ازدادت فرحتي عندما علمت بوجود تست بانك لمادة الأحياء
وكمان أنا إكويس في الإنقليزي
فقلت أنا ما عندي غير الكيميا والإحصا
ولكن
مع هذا التساهل في الأحيا
أصبت بنفس العدوا في الكيميا
لأنو الدكتور حقنا اعتذر لأنو يدو مكسورة
فجابولنا واحد بديل
يقول انو يدرس حقين الهندسة
يعني ما كنت افهم منو اي شي لسطحية شرحو
المهم
وقعدت أفحط في الإحصا من ثاني درس
وعدت الأيام
مشيت في الإختبارات الدورية
كان مجموعي في الإختبارات الدورية للـ ( كيميا - أحيا - إحصا ) 30 -- 35 درجة تقريبا
وقلت خليني أضرب في النهاائي
لكن أصلا أنا من البداية متساهل
فما ينفع أغير نفسي فـيوم وليلة (إلا أن يشاء ربي )
بس وجا إختبار الأحياء النهائي
ودا اللي سار ( ردي في أحد المواضيع )

المشاركة الأصلية كتبت بواسطة raddow مين اللي يقول إنو الأحياء كانت سهلة ؟؟ صح إنو كان في تست بنك لكن فيلو 900 سؤال على الأقل وكل سؤال تقريبا 5 إختيارات يعني مذاكرة دا التست يحتجلها أسبوع ودا الشي اللي أخدت مقلب فيلو حشرت نفسي في وقت جدا قصير على بالي إنو سهل لكن الحمد لله مدري كمان ادا جاني f في الكيميا فراح أسحب من الجامعة وبكدا أكون واحد من اللي نجحت عليه خطت الجامعة في التصفية ..!!! الله يوفق الجميع ......

والإحصاء ذاكرت الصراحة
بس برضو حشرت نفسي في وقت قصير
والكيميا سلملي
حايس فيها من أول الترم
وأخيييييييرا طلعت نتيجة الأحيا
ورحت زي المجنون أفتح الأودس
بعد ما فتحتو قلت يا ليتني ما فتحتو
أخدت f
أصبت بإحباط شديد
لدرجة أني حلمت بالدرجات ديك الليلة
والله يستر من الكيميا

خلاصة الكلام
إنو أنا اللي قصرت وحسبت الجامعة سهالة
واللا ليش في ناس جابو 5 من 5 العام الماضي ؟؟
فيا معشر التحضيري ( التحطيمي )
لحد يلوم الجامعة أكثر من ما يلوم نفسو
صح إنو الجامعة غلطانة في دا المنهج 100%
على فكرة
دا المنهج تقريبا هو نفس المنهج اللي كانو يدرسوه حقين الطب أول سنة (قبل نظام التحضيري)
فشدو حيلكم الترم التاني
أنا يمكن أروح ضحية لدي السنة وأسحب إدا جاني f تاني ( الله لا يقدر )
ودي اشوية نصايح للطلاب الجدد في خطة " ب "

- بالنسبة للأحيا فزي ما قلت تحتاج لمذاكرة التست بنك أسبوع أقل شي
- الكيميا أنصحكم تاخدو مدرس خصوصي لأنو المنهج جدا طويل وممل
- الإحصا فما يبغالها غير مذكرات د.سعيد ونماذج الأسئلة القديمة + سؤال الدكتور دائما

أتمنى أكون أفدتكم بشي
و أتمنى كمان ألا تصابو بالإحباط
أنا أعتبر اللي سرلي زي القرصة اللي تصحيك
وخدو تجربتي وأستفيدو منها
و الدنيا لسا ما طارت
وأختم بمثل وحديث
المثل : ( لا تحسبن المجد تمر أنت آكله ... لن تبلغ المجد حتى تلعق الصبرا )
الحديث : روي عن النبي صلى الله عليه وسلم أنه قال : " عجبا لأمر المؤمن إن أمره كله خير ، وليس ذاك لأحد إلا للمؤمن ؛ إن أصابته سرّاء شكر ؛ فكان خيراً له ، وإن أصابته ضرّاء صبر ؛ فكان خيراً له ." رواه مسلم