[sun-rise]

بعد التحية والسلام أحب أن أطرح تساؤلا كبيرا عن آلية وضع جدول الامتحانات النهائية -خصوصا للسنة التحضيرية - وبالأخص للبنات

إنه في وجهة نظري لمن الخارق لقوانين الطبيعة البشرية إننا نختبر الاختبارات النهائية لكل مادة يوم ورا التاني !!!!! دا إحنا ما صدقنا نفتك من الضغط اللي كنا ننضغطو في أيام الثانوي في أسبوعين متواصلة من الاختبارات , أصلا ما في مجال للمقارنة بين اللي درسناه أول واللي دحين بندرسو , أي نعم المواضيع نفسها بس طريقة عرض المعلومة مختلفة تماما ! فمن الطبيعي بل من المنطق إنو طالما كتبنا في هادي السنة أضعاف مضاعفة من اللي كنا ناخذو في الثانوي , دا غير إنها بالإنجليزي وهادا تحدي ثاني بالنسبة لنا . وطالما إنو الإختبار النهائي رح يكون شااااااااااااااااااااااااامل للترم كامل , وهنا أسمحولي أقول إنو هادا عبط !!!!! المفروض خلاص شي اختبرنا فيه , خلاص , فنيتو , نعدي عاللي بعده -وجهة نظر خاصة -فبالتالي لازم احنا البنات ما نيأس أبدا , ونخلي أملنا بالله كبير , ونرفع أصواتنا وأيادينا معترضين وبكل قوة لهذا الظلم قبل أن يفوت الأوان !!!!!!!!!! وقبل ما نقرب من موعد الامتحانات أكثر وأكثر !!!! ,
لازم من بكرة -إن شاء الله- نكلم العمادة والأستاذات , ونقنعهم بإنو الجدول بهذه الطريقة حيتعبنا نفسيا ومعنويا وذهنيا وفكل شي , وحا نقدر نركز على ولا مادة بهادي الطريقة !!! حتى لو نكتب خطاب للعمادة بطلب جعل أيام تفصل بين المواد أقلها يوم واحد بين كل مادة والتانية . ونمرر الخطاب على جميع الشعب المختلفة عشان نوقع بالموافقة الاجماعية .. وأنا أستغربت من اللي يبغوا يقدمو الاختبار للخميس ؟!؟
يابنات كل ما كان الموعد أبعد كل ما كان هادا فصالحنا ...
عموما : نبغى نطلع بإذن الله بنتيجة فعلية ونقنع العمادة بضرورة جعل أيام راحة بين كل اختبار و الثاني . ولا عز الله رحنا فيها !!!
وإن شاالله لا يضيع حق وراءه مطالب ... وقت الكلام راح , جاه وقت الفعل.....ما باقي وقت !!! الرجاء من كل المستائين من الجدول , يعبروا عن رأيهم , ويدعموا الحملة .