والله تبغى الصراحه انا كرفت على نفسي وشديت حيلي الين انقطع
اللابتوب ودسيتو عني والجوالات حولتها مقفل قبل الاختبارات باسبوع
تلفزيون سويت خير ووديته الصاله وانبسطو مني كلهم يتفرجون
خروج من البيت ما اطلع الا البقاله ولا المسجد
مدرس خصوصي جبت حق فيزيا ورياضيات
تصوير نص المكافآه راحت فيه
وقت فراغ ما كان في
يا اني اذاكر يا اني انام على كلام دكتورنا
وفي الاخير درجات الله لا يوريك ولا تجيك زيها في يوم
14 و 16 و 19
تخيلو اسهل المواد مهارات الاتصال 19 من 30
والمشكله الي يغبنك مو حسد ولا اي شي بس شوي هاه واحد تشوفه ما في راسه دراسه ولا هو حول الدراسه
يجيب 25 و 26
صح لازم نشد حيلنا
لكن انا اقولك انه حيلي انقطع من اول اختبار دوري ولسا كم اختبار دوري قدامنا في السنه 6 اختبارات يعني تقريبا 30 اختبار دوري
ونحنا اول اختبار حطمنا
ههه الله يرحم ايام الثانوي
|
اول شي اهلا بيك D700mI
اهتمامك بنفسك وقت الاختبارات دليل على انك انسان مجتهد واللي سويتو من تقفيل الجوالات واللاب توب وغيرو شي طيب جدا
شوف يا D700mI احنا علينا نتوكل على ربنا ونجتهد وبعد كدا خلاص
"اللي ربنا كاتبو بيصير " ولازم نرضى بيه
صدقني لو جيت تفكر على ايام مذاكرتك للاختبار الدوري الاول راح تحصل حاجة غلط في اسلوب المذاكرة هوا اللي خلاك تنقص دي الدرجات
يا إما تسهر وتروح مواصل او ان مكان المذاكرة ..طريقة المذاكرة فيها شي
وكلامك اللي كتبته دليل على انك كنت شاد حيلك لدرجة انك حولت الاجتهاد دا الى ضغط نفسي وعصبي كبير
أثر عليك في حلك في الاختبار
طبعا انا بقول دا كلو على ضوء كلامك اللي كاتبو بس ممكن اكون انا غلط
لكن كلامي اللي كتبتو لك مبني على تجربة شخصية وتجارب بعض اصحابي
وعلى فكرة يا D700mI ترى الفرق بين الثانوي والجامعة كبيييييييييييييير
خصوصا في المذاكرة واظنك تتفق معايا في دي النقطة عالاقل
في جملة عجبتني تقول study smart ... don't study hard
حاول تطبق دي الجملة على مذاكرتك وان شاء الله تفيدك
اما بالنسبة لنقطة انو في ناس مالهم في الدراسة ويجيبو احسن منك ... فأنا فاهم عليك
وحصلتلي واتضايق منها لمن تسير
لكن زي ما قلت في البداية كلو بيد ربنا واحنا مالنا غير الرضى والرضى فقط بما كتبه الله لنا
اخر حاجة
أنا ارجوك انك تستمر في الاجتهاد وتحاول قد ما تقدر وصدقني ربنا ما يضيع تعب احد
واللي فيه الخير ربنا راح يكتبو لك
الله يوفقك وان شاء الله الاختبارات الثانية دي تكون فأل خير عليك وتجيب فيها اعلى الدرجات
اتمسك بالامل ولا تفقده
بالتوفيق
:)