[مشموشة]

صباح الخير ياعسلات
اولا انا تخصصي فرنسي وكالعاده الجامعه تفتح تخصصات وبعدين ماتعرف اش تسوي بالمتخرجات
يعني انا كنت اتمنى انه يفتحو تخصص فرنسي للماستر ليا وللبنات المتخرجات بكالوريوس فرنسي
ولكن
ردد ياليــــــــــــــــــــــــــــــل مااطولك
ثانيا يفتحوا اقسام ويخلو كل البنات يقدمو عليها وهما اصلا مخططين انهم ماياخدوا الا بنات القسم
طيب ليش تعطونا امل اننا نقدم ؟؟
من البدايه الوجه من الوجه ابيض مايحتاج تخلونا نروح ونجي واخرتها كل اللي قدموا تصيبهم حلات اكتئاب ابتداءاً من قضم الاظافر وانتهاءً بتنتيف الشعر
القصه ومافيها اني قدمت ع تخصص علم نفس للماستر بما انو مافي خيارات تانيه وكمان قولت نفس كليتي .. المهم اني الحمدلله وديت الاوراق وقالتلي اللي اخذت اوراقي روحي للقسم واسالي متى الاختبار
..روحت لسكيرتيرة قسم علم النفس وسالتها في مراجع او شي
قالت لا اختبار عادي يعني اكيد عندكم خلفيه عن علم النفس والمواد اللي درستوها
تحسبني بكالورريوس علم نفس
قاطعتها وقولتلها بس انا تخصصي غير ..
قالت ايش تخصصك ؟
قولتلها فرنسي
وجهها اتغير واتقمصت .. وحسيت من تعابير الوجه انه مافي امل ينقبلو غير بنات القسم
طيب السؤال اللي يحتاج اجابه صريحه ليش تتعبونا وتقولوا قدموا واختبروا؟؟؟
ليش من البدايه ماتقولوا انه كل ناس يدرسوا في تخصصهم؟

طيب سؤال اهم للمسؤلين؟
اللي ماعندهم امتداد لتخصصاتهم اش يسووا
ونفسهم يدرسوا ويكملوا
ولا احنا بنات البطة السودة؟؟

ياناس شوفولنا حل عدد كبير من الطلاب والطالبات عندهم حلم لاكمال الماستر
والجامعات متوفرة ولله الحمد اش اللي ينقص منكم لمن كلنا نبغى نكمل
وليش تحديد مقاعد ؟؟
خلوا الناس اللي نفسها تدرس تكمل
كل شي صعب .. مافي شي يتم بسهوله لازم نتمرمط عشان ندرس
ولازم نتمرمط عشان نتقبل!
ورجاءً لاحد يقول كل شي سهل وقدموا ومدري اش سووا .. والمسؤولين بسووا اللي يقدروا عليه وكلام فاضي!
نبغى ندرس وبس
مانبغى تعقيد
الرحمة يامسؤولين!!!!