رد: مستقبل أطباء الأسنـان .. ( دعوة للمناقشة ) [مشــــرق بإذن الله]
د. ريودي
يعطيك العافية على مشاركتك
وحبيت اهتماماتك و سبب اختيارك للتخصص , اللهم اجعل نيتنا خالصة لك دوما
ربي يوفقك وعقبال لما تحقق كل طموحاتك ونشوفك طبيب أسنان يشرّف دينه وأمته =)
,,
بالنسبة للحفظ
هذه أكبر الأخطاء اللي يقولوا عنها في الطب , أنها تعتمد كثيـــــرا على الحفظ
لكن الدكاترة عندنا أثبتولنا انه مو كل شي حفظ وكل شي يعتمد عليه
لأنه مع كمية المعلومات المهولة اللي بناخدها بالطب , الحفظ لوحده مره ما حيفيد
لأن المعلومات حتدخل في بعض وما حتتذكرها وخاصة لما تحتاجها عمليا
فلازم الفهم أولا ومن ثم الربط للمعلومات مع بعضها , وربطها بأشياء متواجدة في حياتنا لسهولة تذكرها
يعني مثلا في المصطلحات الطبية , مرادف كلمة تحت أو اسفل هي sub
وممكن نربطها بأن الواحد لو "سب" بمعنى شتم واحد تاني راح ينزل مستواه ويكون واطي
ودا مررررره حيفيدك في مادة الاناتومي اللي كلها أسماء وأماكن
وفي مادة الدنتال اناتومي , لأنك حتدرس كل سن في فم الانسان من كل الجهات حقته( mesial - destal - lengual - labial )
غير أوقات طلوع الأسنان ومتى تطيح وووو
فاذا ما ربطتها بطريقة , مستحيل تتذكر كل دا بسرعة
والدكاترة علمونا على طريقة للمذاكرة وهي:
أول لما ناخد المحاضرة حتكون درجة فهمنا واستيعابنا تقريبا 25-50% فقط
لكن اذا رجعنا البيت وقرينا المحاضرة (فقط قراية وليس حفظ ومذاكرة)
حتتثبت النسبة وممكن تترفع إلى 75%
ولما نذاكرها كويس في نهاية الكورس نكون ثبتنا الـ 75%
ولما نذاكرها للاختبار نكون فهمنا بنسبة 100 %
ومو كل المواد تعتمد على الحفظ بدرجة كبيرة
مثلا الفيسيولوجي , لو ما فهمت ما راح تحفظ
وممكن شوية من البيوكمستري برضو
وأنا أشبه دراستنا للطب زي تعلم الانجليزي أول مره
بدأنا بحفظ الكلمات و الأفعال والضمائر
بعدين صرنا نطبق على القواعد , ومع الوقت صار شي بديهي وعادي بالنسبالنا الفهم و التفكير بالانجلش
حتى مو لازم نعرف كل كلمة ايش ترجمتها بالعربي
بل نفهمها من سياق الجملة ككل
حتى اني احس ان اغلب مذاكرتي صارت قراية
وأقعد أعيد وأزيد في القراية هذه واستوعبها , بعدين أشوف نفسي حفظتها مره كويس
والحمد لله درجاتي عالية في المواد
|